الطيب فرصه والجمايل توافيق
ومن لا توفق ماكتِب له جماله
ومن لارقى للطيب روس الشواهيق
مازان له وقته على مابدا له
وما دام لفعول الجمايل عشاشيق
كسب الجمايل مايجي بالسهاله
ولو انها تشرب على فكّة الريق
كلٍ خذا له كل ما أصبح بياله
والطيب منوه للقلوب المشافيق
كلٍ يتوق ومنوته راس ماله
والمدح ما يزهى على الرجل ويليق
الاّ لصارت وافيات خصاله
يستاهله رجل يفكّ المزانيق
اللي يقال ونعم لاجا مجاله
ومن ساقته نفسه وهو ما بعد سيق
لأجل الجميل يزيّن الله فاله
والمرجله ما هي بتحتاج تنسيق
من بين قلب اللي عشقها وباله
ومن عادة الدنيا تخون المواثيق
تفترّ مكرتها سواة المحاله
ولولا اللوازم ماعرفنا المخاليق
مانعرف الرجّال لين نعنى له
والكفو تظهر فزعته حزة الضيق
وينشاف في الشده بعين العداله
نسل الرجال متعّبين الملاحيق
متوسط من بين عمه وخاله
واللي يطيق ولا بغي قال ما أطيق
تحرم عليه المرجله والشكاله
والهيّنه تكبر على اللاش والهيق
له في الرخاء قاله وفي الضيق قاله
والطيب شاره والضماير صناديق
واللاش طيبه ما تعدّى ظلاله
وأنا أسبر قلوب الرجال المغاليق
والصامت أقطع غايته من مقاله
ومادام في الدنيا رجال ومطاليق
نصيتهم واللاش مالي وماله
للشاعر سعد بن مناحي القحطاني
07-01-2017, 01:51 AM
There is music
العرض العادي
